شعر

1

ائویم قارانقولوق

کیبریت یاندیرمایین ...
یاندیرمایین کیبریت...
قاپ قارالیقدا توزلو قویون قالیم
ویون توزلو قالیم قاپ قارالیقدا
یاتاقدا
یاتاقلاردا
تپیکلنمیش بختیم کیمی...
آجی یووامدا قالمالی یام
( سوواردیغیم کوچه ده ...
سوو سپدیگیم کوچه ده ...
گوزوم یولدادینی
باشا دوشمه میش کوچه ده ... )
قویون دانیشیم
قولاغیم سسده دیر
قارا یئل اسمه گی ییرتیق ایستک لریمی
اینجیدیر
اینجیمی شم
آچیق چای بئینیمی دیله دوتوب
اوتاقین شئیلری اوخشاییر قاپینی ...
بیلیرم
بیلیرم
گئجه م گوندوز اولمایاجاق
بیلیرم
بیلیرم
اولمایاجاقدیر گئجه م گوندوز
توکنمز ایزلرینین آغریسینی
شیدیرغی شیدیرغی ناسیل بیچمه لی ...
ناسیل تاپمالی...
هایلایین هایلایین
سیزین سسینیزه بلکه آجیخا ...
بلکه سس وئره ...
بلکه توتوشایارالاریم...
ها..........
ها..........
هایلایین
هایلایین
قوجا یئل سسینیزه بلکه سس وئره ...

2

ایلین ایکینجی آییدیر
قیزاران آی ،
سیلکه لیرم اوزومو
آغاجلیغیم توکولور
گووده دویغو بوداقلاتنیر

سارسیدیجی بیر شئعیردن
بالتالی بیر ناغیدان یازیرام
چیلغین بیر یولچودان
یولونو
بوروقلوقا سالمیش
پینتی یازیقلیقلاریمی بیتدیره ن سئوگی ...
پاسلی یازیرام
توزلو ،
کسگین بویلاناجاقیمدان
ایلین ایکینجی آییندا
بوداقلاریمی قوپ قورولوقا باغیشلامادان
.
.
.
گوزوندن ایراق
گوزومون یولا گلمه مه گی
دوشوندورور
سایخینجا آغاجلیغیمی
زئر زئر آغلایاجیام
.
.
.
ائی
ائی
بوداق سیز آغاج وارسام
بو
داق
سیز
آغاج ...
بار وئره بیلمه یه جی یم
ائنیش ائنیش
دریلمه یه جی یم
قورتاریش چاغیمدی
نوباریمین قورتاریش چاغی
.
.
.
یاشا
یاشا سئوگیلیم
یورولمایاسان
اولمایان گونلرایله
باشاراجاقینی باشیما گتیردین...
باشا چاتمیشام
_ یاخشی یاریمچیلیق قویمادین
قالام ... _
یاشا
یاشا سئوگیلیم
یورولمایاسان !